கருத்தரங்கம் நடக்குது பார்

கவிதாயினி அவ்வை நிர்மலா

பதவி ஒசர வேணுமுன்னா கண்ணம்மா

கருத்தரங்கம் கலந்துக்கணும் கண்ணம்மா

ஆய்வுசெஞ்சி எழுதிடவே கண்ணம்மா

அதிககால மாகுமடி கண்ணம்மா

வேறுயாரோ எழுதிவச்சத கண்ணம்மா

காப்பியடிச்சி அனுப்பறாங்க கண்ணம்மா

அஞ்சாறு பக்கத்துல கண்ணம்மா

ஆயிரம் தப்பு பண்ணறாங்க கண்ணம்மா

கருத்தரங்கம் ஏற்பாடாச்சு கண்ணம்மா

கட்டுரையும் பதிப்பிச்சாங்க கண்ணம்மா

கட்டுரையப் படிக்கவந்தா கண்ணம்மா

கருத்தக்கேக்க ஆளக்காணோம் கண்ணம்மா

தன்னுடைய பேச்சமட்டும் கண்ணம்மா

தரணுமுன்னு விரும்புறாங்க கண்ணம்மா

அவங்கபேச்சு முடிச்சதுமே கண்ணம்மா

அடுத்தவண்டி ஏறிடறாங்க கண்ணம்மா

மத்தவங்க கருத்தக்கேக்க கண்ணம்மா

பொறுமயில்ல சிரத்தயில்ல கண்ணம்மா

கண்மூடித் தனமாத்தான கண்ணம்மா

கருத்துகளக் குழப்பறாங்க கண்ணம்மா

உணர்ச்சியோங்கி இருப்பதாலே கண்ணம்மா

உண்மைதேட மனசுவல்ல கண்ணம்மா

அடுத்தவரை நக்கலடிச்சுக் கண்ணம்மா

ஆளசிலர் முழுங்குறாங்க கண்ணம்மா

விவாதமெல்லாம் சூடுபிடிச்சும் கண்ணம்மா

விழலுக்கிறச்ச நீராச்சுது கண்ணம்மா

சேரவேண்டிய எடத்தப்போயி கண்ணம்மா

கருத்துசேர முடியலயே கண்ணம்மா!